ياالله يااللي جميع الكون باقداره = ياعالم السر و النيات والسيره

تفرج لمن هو زمانه عذب افكاره = واليا قضي له لزوم خالفه غيره

الوقت ماهمني لو كثرت اخطاره = ولا بنشاه من زوده وتقصيره

نفسي على ماحصل جبره وصباره = ماهمها المال في جمعه وتبذيره

أراوز العز وابني طايح اجداره = لا خربه جاهل في شين تدبيره

كشب المراجل جعلته عندي تجاره = يوم ان غيري يضم المال باشعيره

عاداتنا ننطح القإلات خساره = وإن زارنا مجرم حنا هل الجيره

كم واحد نعتقه لا حانت اقداره = من داخل الحبس لا حلت مقاديره

لا حط فيه الحديد وقصر اهجاره = والباب دونه معسكرة مساميره

ناتيه في حزة ما هي له زياره = ونظهره والوالي هذه تدبيره

ورثنا المجد ورث الجد لصغاره = حنا سنام الظهر ما في الفخر عيره

ما قلتها مدح والعراف عذاره = لاشك من واهج شبت سعاميره

ختمت قولي عدد ما هلت امطاره = على نبي صلاة الله وتقديره